SHQIP

Gjuha Shqipe është gjuhë indo-evropiane të cilën e flet dhe e shkruan populli Shqiptar kudo në Botë.

Shqipja flitet nga rreth 10 milionë njerëz, e kjo: në Shqipëri, Kosovë dhe Maqedoninë e Veriut, si edhe në Malin e Zi dhe Luginën e Preshevës. Ajo është gjuha zyrtare e Republikës së Shqipërisë dhe Republikës së Kosovës, kurse në Republikën e Maqedonisë së Veriut ajo është gjuhë bashkë-zyrtare .

Në dialektet e vjetra, Shqipja flitet në Kroaci (Arbëreshët e Zarës), në Greqi (Arbëreshët e Greqisë, Çamët dhe nga banorë të rajoneve të Maqedonisë Perëndimore dhe Trakës Perëndimore), në Itali (Arbëreshët e Italisë së Jugut në Sicili dhe Kalabri) si dhe në Rumani dhe Ukrainë. Diaspora shqiptare, e cila është e madhe në numër, flet gjithashtu Shqip..

Shqipja, është gjuhë moderne. Ajo përfaqëson një degë më vete në familjen e gjuhëve indo-evropiane. Shkruhet me shkronja latine. Gjuha shqipe ka si dialekte kryesore gegërishten dhe toskërishten, si edhe variantin e vjetër – arbërishten. Fjalori i shqipes ka huazime nga greqishtja e vjetër, latinishtja, nga gjuhët e vjetra të sllavëve të jugut, turqishtja, greqishtja, italishtja e frëngjishtja. Aktualisht po vijnë duke u shtuar edhe huazimet nga anglishtja.